දැව වලින් පමණක් තැනූ බෝගොඩ පාලම



පාලමක් හදනකොට සාමන්‍යයෙන් සවි ශක්තිය ගැන අකුරටම හිතලා තමයි හදන්නේ.ඇණ ගහලා සවි ශක්තිමත් විදිහට පාලම් හදන්න කවුරුත් උන්නදු වෙනවා. ඒත් දන්නවද? එකම ඇණයක් වත් පාවිච්චි කරන්නේ නැතුව හදපු පාලමක් තියෙනවා කියලා. මේක තියෙන්නේ බදුල්ල හාලි ඇල ප්‍රදේශයේ.බෝගොඩ ලී පාලමකියන්නේ මේ පාලමට. ලී වහලයක් සහිත ලංකාවේ එකම පාලම සහ ඇණ භාවිතයෙන් තොරව ලෝකයේ ඉදිකරපු පැරණිතම ලී පාලම විදිහට මේ පාලම සැලකෙනවා.

 

මෙය නුවර යුගයේ ඉදිකරන ලද්දක් යැයි සැලකෙනවා. ඒකට හේතුව තමයි මහනුවර යුගයේ ගොඩානැගිලි වල ලක්ෂණ මේ පාලමේ දකින්න ලැබීම. ගල්ලන්ද ඔය හරහා දමන ලද විශාල ලී කඳන් තුනක් බාවිතා කරමින් තමයි පාලම නිර්මාණය කරලා තියෙන්නේ. තවත් විශේෂත්වයක් වන්නේ මෙහි ඇති අඩි අටක පමණ උසින් යුතු ලීයෙන් කල වහලයි. මහනුවර යුගයට නෑකම් කියන්නා වූ කැටයමින්ද සමන්විත පියස්ස පෙති උළු වලින් අලංකරණය කරලා තියෙනවා. ඒමෙන්ම මෙහි එකඳු ඇණයක් හෝ භාවිතා කරලා නෑ. සියල්ල ශක්තිමත් දැව මූට්ටු වලින් සකසා ඇත. විශාල දැක කඳන් දෙකක් මත ඇති මෙය අත්වාරුවකින් ගමන් කරන්නන්ගේ ආරක්‍ෂාව සපයල තියෙනවා.

හාලිඇල වැලිමඩ පාරේ 11km විතර ගියාම ජගුල්ල හංදියට එන්න පුළුවන් එතනින් වම් පැත්තට තියෙන පාරේ තව 2.5km විතර ගියාම බෝගොඩ විහාරයට ලඟා වෙන්න පුළුවන් (මාර්ගය ගැන මේ විදිහට ටිකක් විස්තර ඇතිව කියන්න හේතු උනේ ගොඩක් අය මාර්ගය හරියටම දන්නෙ නැති නිසා). ගල්ලන්ද කියන ඔය උඩින් තමයි බෝගොඩ පාලම ඉදි කරල තියෙන්නේ.

 

පාලම නිර්මාණය කරන්න ගස් වර්ග 5ක ලී යොදාගෙන තියෙනවා. ඒ තමයි කොස්, කුඹුක්, කළුවර, මිල්ල, මිල් කියන ගස් වර්ග. අඩි 30ක් විතර උස කුඹුක් කඳක් උඩ තමයි පාලම ඉදි කරල තියෙන්නෙ. පාලම ඉදි කිරීමට ප්‍රධනම හේතුව වෙලා තියෙන්නෙ බදුල්ලෙ ඉඳන් මහනුවරට යන්න තියෙන කෙටිම මාර්ගය මේක වීම.බෝගොඩ පාලමේ තියෙන තවත් වැදගත් දෙයක් තමයි උලු වලින් හදල තියෙන වහලය. මේ වහලය හදල තියෙන්නේ සෙවන සඳහාත්, වැස්ස වගේ උවදුරු වලින් ආරක්ෂා වෙන්නත්.

පාලම ඉදි කිරීම එක්ක විවිධ ජනකථා බැඳී තිබෙනව. පාලම ඉදි කිරීම සිදු කරල තියෙන්නේ එක්තරා පියෙක් හා පුතෙක්. පුතාට පාලමේ අවසන් වැඩකොටසක් කරල එතනටම වෙලා ඉන්න කියල තාත්තා වෙන වැඩකට ගිහින් තියෙනව. හැබැයි පාලමේ චාරිත්‍ර වලට අනුව කළයුතු අවසන් වැඩකොටසකුත් තිබිල තියෙනවා. ඉතින් ඒ වැඩටික පුතාට කරන්න එපා කියලයි තාත්තා පිටවෙලා ගිහින් තියෙන්නේ මොකද පුතාට ඒ චාරිත්‍ර ගැන වැඩි දැනීමක් නැතිනිසා.ඒත් පුතාට පාලමේ වැඩනිම කරන්නට තිබුනු හදිසිය නිසා අර තාත්තා එපා කියල ගිය වැඩකොටසත් නිම කරල ඉදිරියට ගිහින් තියෙනවා පියාව මුණගැහෙන්න. ඒත් චාරිත්‍ර වලට අනුව පාලම නිම කරන්න නොහැකි වීම නිසා පුතාට ශාපයක් වැදිල අකාලයේ මිය ගිහින් තියෙනවා.



Share on Google Plus

About Ran Divaina

1 comments: